يومكم سعيد دى صور لمتظاهرى بالتيمور :
عادة مش بلاقى كلام يوصف مدى سعادتى لما بشوف مظاهرة او ثورة فى اى ارض فى العالم فبقضيها نشر صور عن مظاهرات الناس اللى بتطالب بحقوقهم او حقوق غيرهم ، بس بالرغم من سعادتى الا انه بينتابنى خوف من الناس اللى بتموت واللى هتموت !
متظاهر من بالتيمور مقبوض عليه وهو لابس تيشرت مكتوب عليه "فلسطين"
دايما بشوف ان الثورة "اى ثورة" سواء إن كانت اجتماعية او دينية او غيرها بيكون ليها مقابل كبير وهو ارواح بشر عظماء قرروا يتمردوا ، اوعى تفتكروا يااخونا ان التمرد وقرار التغيير دا سهل - ابسلوتلى ! انت فى المقابل بيتم قتلك معنويا عشان خرجت بره القطيع .
عشان كدا لما بشوف الولولة فى عدد الارواح اللى بعدت عنا وبقت فى السماء جراء قيامنا اى ثورة دا بيغظنى جدا - وبزعل من نفسي - هو انا ليه زعلانة وبشارك الاخر الولولة ؟!
كل مايكون فى دم على الارض - كل مايكون فيه حرية .. هكذا يكون الامر ببساطة .
الولايات المتحدة الامريكية بقالها فترة مدكنة على ثورة عظيمة من ساعة احداث فيرجسون ومقتل الشاب مايكل براون على ايد شرطى حقير برضو ، اه طبعا نفسي اشارك في اى مظاهرة فى العالم - انا واحدة أممية وماليش فى جو الحدود اللى بينا دى !!
ازاى يبقى ماليش دعوة بشخص بيعانى لأى سبب كان لمجرد انه اتولد فى مكان وبلد غير اللى انا فيهم ؟! دا حتى مش بأختيارنا احنا بنتولد فين وعلى اى دين وعلى اى لون وعلى اى لغة وعلى اى ثقافة وغيره !
امريكا عنصرية - الشرطة عندهم بنت حرام زى عندنا وزى اى شرطة فى العالم - البشر ذو الاصول الافريقية بيعانوا من اضطهاد بشع ولما حد منهم بيموت مالوش ديه - امام كل 100 سيدة ذو اصول افريقية هناك 84 افريقي فى السجون ! يعنى 1.5 مليون فى السجون من اصل 45 مليون ودى نسبة عالية جدا !
متخيلين ان الشرطة كل مهامها على الكوكب انها تحافظ على النظام الحاكم وعلى مجريات الامور لحسابه ! متخيلين ان اللى بينتمى للشرطة بيكون مجرد اداة من ادوات تانية كتير فى ايد النظام !
فى بالتيمور فى امريكا - المتظاهرين قرروا يسألوا احدى الدوغفات الظباط اللى فى الشرطة ويقولوله ( ليه بتعتقلوا الناس من غير اى اسباب ؟ - فرد الدوغف الظابط بمنتهى الحب بإننا لو هنعتقلكم كلكم ، يبقى هنعتقلكم من غير نقاش !! )
لينك الفيديو :
المهم انه بقى فى ناس كتير بتفكر فى الاشتراكية كحل بديل للرأسمالية العفنة اللى وصلت حال البشرية فى العالم للمنظر دا ، ناخد المانيا اللى الدخل الشهرى للمواطن بتاعها ألاف فى الشهر ونسبة الفقر تكاد تكون معدومة على سبيل المثال يا جماعة .
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.